هل كلمـة (( آســـــف )) تمحـي الجـــرح ....؟

السلام عليكم ورحمة الله ..



بارك الله فيك اخي الفاضل ..



سؤال يضرب في صميم العلاقات المعاصره ..



بعتقادي حتى لو كان القلب ما يقدر يكره ولا يحمل على انسان اي اسى .. نبقى بشر .. نبقى لحم ودم وكتله من المشاعر .. مو كل الجروح تلتئم ولا كل الالم يتنسي .. في شغلات نقدر اذا ما نسيناها نتناساها على اساس ان الي جرحك ندم .. واحط مليون خط تحت نتناساها .. .. بس في شغلات ندم الكون لا يمكن ينسيك الجرح ولا الي جرحك .. والقلوب يوم تنجرح مثل الزجاج يتكسر ويتناثر بكل مكان صعب انك ترجعه مثل الاول .. صعب انك تمسح ولو لحظه الم عاشه هالانسان .. المشاعر كثير من الناس يستهينون بها .. مع ان هي اساس علاقات البشر ببعضهم ..



كما ان قدرة التحمل لدى البشر وطاقتهم تختلف من انسان لاخر .. يعني الي انا اتحمله غيري يمكن ما يقدر يتحمله والعكس ..

كلمة اسف مثل الشيك .. لو كان فيه رصيد ينصرف .. ويمسح الي طاف ولو ترك بعض الاثر .. بس لو كان بدون رصيد بيزيد الطيب بله .. واحسها بتكون اسف مشقلبه خوفي ما توصل حتى لاذن سامعها ..

بس برائي ان كل البشر يتفقون بنقطه ان في شي اسمه نقطة الا رجعه ..



يعني في مرحله لو وصلنا لها ما نقدر حتى نحاول نصلح او نسامح الي اخطى بحقنا او جرحنا مهما كان هالشخص .. (( طبعا ما عدى الام والاب ))

طبعا هالحالة تتولد نتيجه التراكمات .. يعني شي على شي وجرح على جرح مهما كان صغير وتافه في نظر البعض ..

وانا عن نفسي .. علشان ما اوصل لنقطة الا عوده .. دوم اطلع الي بقلبي يعني ما خلي شي بقلبي .. علشان اتم اقدر اتبسم للكل (( قريب او غريب )) ابتسامه نابعه من قلبي ..



كلمة اسف كثير من الناس ما يعرف سحرها .. بس لو كانت صادقه .. وفي مواقف كلمة اسف ما تنفع ولا حتى تشفع .. الله لا يحطنا بهالمواقف ..

وفي مثل يقول المسامح كريم .. والله اكرم .. ويا رب يبعد عنا كل الم وكل جرح وكل انسان بياذينا في يوم من الايام علشان ما نعيش مرارة كسر القلوب ..

واخر شي بقوله .. لو مسكنا دينا عدل .. اعتقد ان محد بيحتاج يقول لاي شخص كلمة اسف ..

يعطيك العافيه اخي الفاضل وتقبل رايئ برحابة صدر .. ام عبد الله